ആസിഫ് അലി.
ജഗതിയെ വെല്ലൂര്‍ മെഡിക്കല്‍ കോളേജ്'ല് കൊണ്ട് പോയ വാര്‍ത്ത നടക്കുമ്പോള്‍
അമ്മ- (സഹതാപത്തോടെ) പാവം ജഗതി....എല്ലാം പെട്ടന്ന് ശരിയായാല്‍ മതിയാര്‍ന്നു. (എന്തോ ഓര്‍ത്ത മട്ടില്‍) ജഗതിനെ കാണാന്‍ മമ്മുട്ടി പോയിട്ട് അവിടെ ഭയങ്കര ലാത്തി ചാര്‍ജ് നടന്നൂത്രേ.....ഫാന്‍കാര് ഇടിച്ചു കേറിട്ടേ...
ഈ ആരാധകര്‍ക്ക് ഒരു ബോധോല്ലേ...ഒരാള് ആശുപത്രീല് കെടക്കണേന്‍റെ ഒരു മര്യാദ ഇവറ്റോള്ക്ക് കാണിച്ചൂടെ....(വീണ്ടും വിഷയം മാറുന്നു.) അത് പിന്നെ മമ്മൂട്ടി ആണെന്ന് വെക്കാം ....ഒരു ആസിഫ് അലി വന്നിട്ട് എന്തായിരുന്നു പൂരം കൊടുങ്ങല്ലൂര്.
ഞാന്‍ - ആസിഫ് അലി കൊടുങ്ങല്ലൂര് വന്നോ....?
അമ്മ- പിന്നേ....മ്മടെ സുപ്രീം കാരുടെ (കൊടുങ്ങല്ലൂരിലെ പ്രശസ്തമായ ബേക്കറിയാണ് സുപ്രീം ) ഷര്‍ട്ട്‌ കട ഉദ്ഘാടനം ചെയ്യാന്‍ വന്നത് ആ ചെക്കനാണ്. ഞാന്‍ കൊടുങ്ങല്ലൂര് ബസ്‌ കാത്തു നിക്കുമ്പോ വടക്കേ നടേല് ഭയങ്കര തെരക്ക്....ഒക്ക കോളേജ് പിള്ളേരാണ്...ബാഗു തൂക്കി ക്ലാസ്സീ കേറാണ്ട് വന്നതാണ്‌ പിള്ളേര്. ഞാന്‍ ആ ജൂസ് കടേലെ ചെക്കനോട് ചോദിച്ചപ്പോഴാണ് ആസിഫ് അലി വന്നിട്ടുണ്ടെന്ന് പറഞ്ഞത്. ഇങ്ങനൊരു സിനിമാ നടനുണ്ടെന്നു മനസ്സിലായത്‌ അപ്പോഴ....പിള്ളേരുടെ തിരക്ക് കാരണം ആസിഫ് അലിക്ക് പുറത്തിറങ്ങാന്‍ പറ്റണില്ല. അപ്പൊ അവരെന്തു ചെയ്തു....അവനെ പുറകിലൂടെ ഇറക്കി ബേക്കറീടെ ഉള്ളീ കൂടെ കൊണ്ടന്നു കാറില് കേറ്റി. ഞങ്ങള് ബസ്‌ സ്റ്റോപ്പില്‍ നിന്നോര്‍ക്കൊക്കെ സുഖായിട്ട് കാണാന്‍ പറ്റി....
ഞാന്‍ - (അത്ഭുതത്തോടെ) അപ്പൊ അമ്മ അസിഫ് അലിനെ കണ്ടോ...?
അമ്മ- പിന്നേ...എന്റെ തൊട്ടു മുന്‍പിലായിരുന്നു കാറ് ....ഞാന്‍ നല്ലോണം കണ്ടു. ആദ്യായിട്ട് ഒരു സിനിമാ നടനെ കണ്ടതാണ്....അവന്റെ പേര് മറക്കാതിരിക്കാന്‍ വീട്ടില്‍ എത്തുന്ന വരെ അത് മനസ്സില്‍ ഉരുവിട്ട് വന്നു. ശാരൂനോട് (ഇളയച്ഛന്റെ മകള്‍ ) പറഞ്ഞു ടി വി ല് അസിഫ് അലി വരുമ്പോ കാണിച്ചു തരണംന്നു.....പക്ഷെ ടി വി ല് അവനു വേറൊരു മുഖാണ്....അന്ന് കണ്ട അസിഫ് അലിയുടെ മുഖം പിന്നൊരിക്കലും ടി വി ല് കണ്ടിട്ടില്ല. (ആത്മഗതം) മേക്കപ്പിട്ടു മാറ്റണതാണ്....
അച്ചുതാനന്ദന്‍
പാര്‍ട്ടി കോണ്‍ഗ്രസ്‌ സമാപന ദിവസം. പി ബി പ്രവേശനം നിരോധിക്കപ്പെട്ട വി എസ് നെ ഒരു ദുരന്ത കഥാപാത്രമായി മാധ്യമങ്ങള്‍ മത്സരിച്ചു അവതരിപ്പിക്കുന്നു.
അമ്മ - (സങ്കടത്തോടെ ) അങ്ങേരു പാവോല്ലേ.....അങ്ങേരെ പി ബി യില്‍ എടുത്താല്‍ എന്താ കുഴപ്പം. പിണറായി ദുഷ്ടന്‍....
ഞാന്‍ ഞെട്ടി. പി ബി എന്താണ്, പാര്‍ട്ടി കോണ്‍ഗ്രസ്‌ എന്താണ് ഒന്നും അമ്മക്കറിയില്ല. എന്നിട്ടും അമ്മയെ കൊണ്ട് പിണറായിയെ ദുഷ്ടന്‍ എന്ന് വിളിപ്പിക്കുന്നതില്‍ മര്‍ഡോക്കും മാമ്മന്‍ മാപ്പിളയും വിജയിച്ചു . (ലോകം അവസാനിച്ചാലും അരിവാള്‍ ചുറ്റികയില്‍ മാത്രമേ വോട്ട് കുത്താവൂ എന്ന് അമ്മയെ അപ്പൂപ്പന്‍ പറഞ്ഞു പഠിപ്പിച്ചതാണ്. മര്‍ഡോക്കും മാമ്മന്‍ മാപ്പിളയും വിചാരിച്ചാല്‍ അത് മാറ്റാന്‍ പറ്റുമെന്ന് എനിക്ക് തോന്നുന്നില്ല.)
സുരേഷ് ഗോപി.
സുരേഷ് ഗോപി അമ്മയുടെ ശത്രുവാവാന്‍ കാരണം അദ്ദേഹം അച്ഛന്റെ മിത്രമായതാണ്. ഏഷ്യാനെറ്റ്‌ പ്ലസ്‌, കിരണ്‍ എന്നീ ചാനലുകളില്‍ ഏതിലെങ്കിലും വൈകീട്ട് എഴരക്ക്‌ സുരേഷ് ഗോപിയുടെ സിനിമയാണെങ്കില്‍ (അതെത്ര തല്ലിപ്പൊളി സിനിമ ആയാലും ) അച്ഛന്‍ പിന്നെ വേറൊന്നും കാണില്ല . ഇതേ സമയമാണല്ലോ കുങ്കുമപ്പൂവ് , ഹരിചന്ദനം തുടങ്ങിയ സംഭവ ബഹുലമായ സീരിയലുകള്‍....സുരേഷ് ഗോപി അമ്മയുടെ ശത്രു ആയില്ലെങ്കിലെ അത്ഭുതമുള്ളൂ...
പക്ഷെ, ഈ ശത്രുത സുരേഷ് ഗോപി തന്നെ പരിഹരിച്ചു. ഇപ്പൊ അച്ഛനും അമ്മയും ഒരുമിച്ചിരുന്നു കോടീശ്വരന്‍ കാണുന്നു. പങ്കെടുക്കുന്നവര്‍ക്ക് സമ്മാനം കിട്ടുമ്പോള്‍ സന്തോഷിക്കുന്നു. അവര്‍ പുറത്തു പോകുമ്പോള്‍ ദുഖിക്കുന്നു. സുരേഷ് ഗോപിയുടെ അവതരണം മുകേഷിന്റെ ഡീല്‍ ഓര്‍ നോ ഡീല്‍ അവതരണത്തേക്കാള്‍ മികച്ചതാണ് എന്ന ഒരു സര്‍ട്ടിഫിക്കറ്റ് കൂടി സുരേഷ് ഗോപിക്ക് സമ്മാനിച്ചിരിക്കുന്നു. (എല്‍ ഡി സി റാങ്ക് ലിസ്റ്റിലുള്ള അനിയത്തിയോട് കോടീശ്വരന്‍ പരിപാടിയില്‍ പങ്കെടുക്കാന്‍ എസ് എം എസ് അയക്കാന്‍ അമ്മ നിര്‍ബന്ധിക്കുന്നുണ്ട്. അവള്‍ പങ്കെടുത്താല്‍ ഒരു കോടി രൂപ കൊണ്ട് വരും എന്നത് അമ്മയുടെ വിശ്വാസമാണ്. എതോരമ്മയെയും പോലെ മക്കളിലുള്ള വിശ്വാസം. )
